BOLETÍN INFORMATIVO -Enero 2012-

DE LOS SOCIOS

La zaguera semana de 2011, se paseron ta lo cobro por los bancos las ultimas quotas pendients, un total de 54 euros. Agún queda bel par de domiciliacións sinde replegar, que s’apanyarán en l’anyada que i somos.
La masa social queda, como ya se diciba en lo boletín de sanmigalada, con cuasi un par de cientos de socios(191), dimpues de rechistrar más d’una cinqüentena de baixas y quasi una trentena d’altas.

Ta los que se miren estas fuellas con la lupa de la curiosidat lingüistica, veyeretz que son escribidas d’una traza una miqueta diferent de lo que yera un costumbre. La diferencia ye que miramos d’adoptar las normas graficas que proponié l’anyada pasada lo Estudio de Filolochía Aragonesa (Academia oficiosa de l’Aragonés, entre que no bi n’haiga otris...). Pero no bi ha que parar muita cuenta en la forma en que s’escribe... lo important ye que se prenuncie de la misma mena que siempre..., que ya nos aprenderemos las normas...

Vos remeramos tamién que la comunicación entre nusotros ha que estar contra más fácil, barata y rauda, muito millor. Por ixo, siguimos contando con la cuenta de correo labordadeciresa@gmail.com, blog: www.labordadeciresa.blogspot.com, y un espacio en www.facebook.com/labordadeciresa , en do se puede colgar toda la información, videos u fotos que vos cuaque meter.

Actividatz y noticias
Navidad.-Se’n son pasadas las fiestas de Navidad, u Nadal, dimpués de lo puent de la “inmaculada constitución”. La Borda s’ha tornau a activar en todas ixas fechas, en que acude la chent forana a disfrutar de los nuestro entorno. Ye de remerar que s’han celebrau no pocas cenas, u lifaras, u colitatueras, con l’aduya inestimable de la chovenalla, que se ven fendo cargo de lo bar y las mosicas... Y a los menos chovens..., que lugo’n ven a xalapar chuletons, u a untar d’allo talladas de pan pa pasar lo vino...

Lo belén.-La nuestra consocia Corina Gracián Pierre, con aduya de bels crietz y muito triballo de la suya parti, nosmonté un goyoso Belén en la salón. Otra anyada, a mirar si somos capaces de sacarli mas partido, fendo cantar villancicos a los críos y amostrandolisne, u fendo plegar a lo Papá Noel, u los Reyes Magos... en fin, custión de itarli ganas.

Plans de triballo.- Se ye mirando d’organizar, a curto plazo, un taller de triballo adedicau a construir un par de “cabezudos”. Entre Corina y Esther (de lo albergue), paretz que conocen las tecnicas con las que se fan.
Otra ideya sería la de fer un “gigante” con la figura de “L’hombre de las narices”, que como sabetz, saliba la zaguera nueit de l’año, en busca de arrapiezos por las carreras, dimpues d’haber estau toda l’anyada escondíu en lo sulero de Poli (lis diciban en lo barrio de San Pedro) u en lo de Migalé (a los de lo barrio de la virgen).

Otris... A radiz de cambeos en los cobros de la empresa electrica municipal, detectemos que nos cobraban lo consumo de la consulta medica. Se demandé la suya rectificación, y a curto plazo nos tornarán 735 euros, por los mas de 4.600 kilowatios que nos heban cobrau de mas.
Hemos mercau bels cataticos pa los chugos tradicionals y p’amillorar lo material audiovisual... no plega ta 200 euros...
Hemos propuesto como patrono reprensentante de Ciresa en L’Ausín, a Corina Gracián, que voluntariament se ofrecié ta ixa encomienda... Vos remeramos que sigue ubierta la suscripción de bonos socials d’ixa fundación, de 500 euros, al 3,5% anual, a dos anyos, prorrogables.

Muitas gracias por l’atención. Seguiremos informando...